لعبة الكون: حوّل قصة خلق الكون للعبة تشاركية مع طفلك

حصة العلوم صعبة على ابنك أو بنتك؟ بيهرب من المذاكرة لللعب؟ إيه رأيك لو خليناه يشوف العلم من خلال لعبة… نخلي قصة خلق الكون رحلة، وانتشار الديناصورات وانقراضها فزورة، ووجود البكتيريا الخارقة قرار هو بياخده؟

كل دا بالفعل وأكتر موجود في لعبة “الكون”؛ لعبة عائلية شاملة علوم كتير، هيحب طفلك فيها العلوم بطريقة مختلفة، هيمزج اللعب والتعلم والمنافسة، طريقة جديدة هتخليه يبص لتفاصيل كتير حواليه بشكل مختلف وكل لاعب فيها هو صاحب قراره، يقدر يختار مصيره بنفسه، وقرارته بتحدد اتجاهه.

لعبة “الكون” هي لعبة لوحية “زي بنك الحظ/مونوبولي” وهي لعبة أسرية تعليمية، هتبدأ فيها الرحلة من لحظة الانفجار الأعظم، لحظة بداية الكون، وهتمشي في رحلة طويلة عبر مراحل نشأة الكون المختلفة، تكوّن العناصر والنجوم والمجرات والمجموعة الشمسية، نشأة الحياة وحتى خلق الإنسان.

في لعبة “الكون” هيقابلكم عقبات كتير، هتتحدى اللعبة، وهتتحدي منافسينك كمان، وهتلعبها مرات كتيرة جدًا، تقدر تختار تتعاونوا سوا ولا تنافسوا بعض على موارد الكوكب المحدودة .

اللعبة كمان بشكل أساسي موجهة للأطفال في مراحل التعليم الأساسي، وده عشان الأسلوب فيها مبسط وكروت المعلومات فيها شرح واضح ومختصر للمفاهيم الأساسية في الكون الشاسع، والهدف منها إن ابنك يحب العلوم بطريقة مختلفة عن طريقة المدرسة التقليدية، من خلال لعبة بتسليه وبتخليه ينافس كل اللاعبين التانيين معاه.