صولو الخليفة

المتهم: بس ساعي البريد ماماتش وخرج في المشهد اللي فات حي يرزق.
وكيل النيابة: إحنا بنحاسبك هنا على نية الفعل مش على الفعل، إنت قتلته معنويًّا وبعدين خبيته وسحبته، كون الراجل ماماتش دي مش قضيتنا هنا.
المحامي: بس إحنا مش ممكن نحاسب الناس على نيتهم، إحنا لينا الفعل واللي حصل مش اللي كان ممكن يحصل.
وكيل النيابة: دلوقتي لو فيه إرهابي إتمسك قبل ما يرتكب جريمته مش هيبقى إرهابي؟
أعضاء المحكمة: طبعًا إرهابي، إرهابي طبعًا.
وكيل النيابة: يبقى الراجل ده قاتل.. قاتل.. قاتل.
تصفيق حاد
المحامي: بس دي مغالطة كبيرة وشيء ضد المنطق، العبرة بالنتائج مش بالنية لأننا لو حاسبنا كل واحد على نيته حانبقى كلنا مذنبين.
وكيل النيابة: يابني هو ده النظام.. اللي لازم نمشي عليه دلوقتي والعالم كله بقى قرية صغيرة ولا مابقاش قرية صغيرة؟!
المحامى: بقى قرية صغيرة عدَّاك العيب يا باشا.
وكيل النيابة: لذا نطالب بتوقيع أقصى العقوبة على المتهم.
القاضي يقف ويضرب بعصاه ضربات سريعة ثم يقول الحكم بعد هذه الرقصة..
الحاجب: تانجو
يرتفع صوت (دي. جي) وينخرط الجميع في الرقصة، وبعد الانتهاء منها يدخل الشهود واحدًا تلو الآخر..
السيدة صاحبة الكلب: أنا صاحبة الكلب والراجل ده غير متعاون وغير متعاطف مع الحيوانات الأليفة.
الزوجة: مش عايز يغير التلاجة من عشر سنين.
مندوب شركة الإعلانات: لا يشترك في المسابقات ويتعامل مع المنتجات بعدم احترام.
ساعى البريد: أنا اللي غايظني يا باشا إنه موتني من غير حتى ما يجيبلي كوباية ميه.
القاضي: نظرًا لكل هذه الوقائع التي تثبت تورط المتهم ونياته الخبيثة وبعد استماعنا لرائعة السيد وكيل النيابة تأكد لدينا بما لا يدع مجالًا للشك أن…